Laresers Endepandan Pou Laverite
Ozordi, nou pou prezant zot en prensip lafwa bahay tre enportan pour progre nenport ki imen e sa se laresers endepandan pou laverite. Ozordi zour, bokou dimoun i ankor pe esper retour Zezi Kri. Zot ekspekte, ki i pou vini, e akonpli tou bann profesi mo pou mo. Zezi in retournen me pa dan sa fason ki bokou ti pe espekte.
Bann profesi in touzour en tes pour limanite. Si bann profet ti vin dan sa fason literal parey ti’n ganny promet, personn antre nou pa ti pou ganny sans devlop nou persepsyon spirityel. Bahá’u’lláh in dir nou:
Ziz byen: Si sa bann profesi ki’n rikorde dan levanzil ti pou akonplir literalman, si Zezi, garson Mari akonpannyen par lanz, ti pou desann dan lesyel vizib lo nyaz; lekel ki ti pou oze refize kwar, lekel ki ti pou oze rezet laverite?”
Bondye i anvoy son bann mesaze dan laform en et imen. Sakenn i vinn avek Son prop non, son prop misyon e avek son prop fason pou akonpli bann profesi. I pa fasil pou limanite rekonnet bann mesaze Bondye. Laplipar dimoun pa kapab vwar en profet atraver laform imen. Bann mesaze Bondye pa zanmen resanble lide ki bann dimoun in formen lo zot e zot pa akonpli bann profesi dan lafason ki bann dimoun ti pe espekte.
Bann mesaze Bondye i sanz lalwa ki dimoun in obzerve pou milye lannen ; alor bann dimoun i dir ki zot vinn detri larelizyon, menm si an verite zot vin senpleman renouvle tou sa bann lareg. Zot dir ki bann Mesaze Bondye i lasours fernwar e bann mal lo later, menm si an realite zot sa vre lalimyer pou lemonn.
Bokou dimoun pa kapab rekonnet bann mesaze Bondye dan zot lepok akoz zot pan’n zanmen fer en lenvenstigasyon pou laverite par zot menm. Dan lepase bann krwayan ti souvan kwense e pa ti ganny sa sans poz kestyon. Bann dimoun ti kwar dan sa ki zot fanmiy, zanmi, ou sef relizye ti kwar. Zot pa ti panse, priye ou fer resers par zot menm. Tou sa ti ganny fer pou zot par en lot endividi.
Me Abdu’l-Baha dan son liv entitile “Proklamasyon lape iniversel” I dir nou:
Okenn zonm pa devret swiv son bann zanset dan en fason aveg. Non, me sakenn i bezwen vwar ek son prop lizye, tann ek son prop zorey e sers laverite par limenm afen ki i a kapab swiv laverite olye soumisyon aveg e imitasyon bann kwayans ansestral.
Ozordi Bahá’u’llah i ansenny nou ki sak endividi i devret fer resers pou laverite par limenm ziska ki i fer son prop dekouver e ariv lo en konklizyon par limenm, san ki i depan lo panse e lopinnyon en lot dimoun.
Resers endepandan i demann bokou kouraz e zefor, me Bondye in donn sak enn de nou sa kapasite pou rekonet laverite. Detasman i enn bann eleman enportan ki ed zonm dan son resers. Bahá’u’lláh I konsey bann ki pe fer resers pou met akote tou son lanmour e laenn ki i annan pou lemonn, akoz lanmour i kapab pous li atraver bann keksoz mal e laenn I kapab anmenn li pli lwen ek laverite.
Abdu’l-Baha I donn nou sa konsey swivan:
Afen ki nou a kapab vwar laverite, nou bezwen abandonn nou prezize, nou prop nosyon ki san lenportans; en lespri ouver e reseptiv i esansyel. Si nou lakoup i ranpli avek legoizm, pou napa plas ladan pou delo lavi. Lefet ki nou imazin nou menm dan byen e tou lezot dan mal, sa i en gran lobstak dan semen ver linite, e linite i neseser si nou pou arive vwar laverite, parske laverite i en sel…
Parfwa lanmour i fer en dimoun fer keksoz ki i konnen pa byen, e santiman en dimoun i kapab anpes li tann laverite sorti kot en lot ki i pa kontan. Detasman i retir tou sa bann vwal ki anpes nou vwar laverite.
Ler Bahá’u’lláh i demann zonm pou fer resers endepandan pou laverite, in kit plis gidans pour zonm pou ed li dan son resers, e sa, bann lezot mesaze lepase pan’n fer. Anplis ki sa bann santenn liv sakre ek tablet, ki Bahá’u’lláh in kit deryer pou nou, sa Mesaze in osi apwent son garson Abdu’l-Bahá, pou entrepret Son lansennyman. Abdu’l-Bahá an retour ti apwent Shoghi Effendi, son pti zanfan koman Son sikseser e Gardyen lafwa Baha’i.
Okenn Baha’i malgre byen verse dan bann lekritir Baha’i pa kapab fors en lot dimoun pou aksepte son panse e lesplikasyon lo bann lansennyman Baha’i. Abdu’l-Baha i esplike:
Bondye i’n donn zonm lizye envestigasyon par lekel i a kapab vwar e rekonnet laverite. In donn li zorey afen ki i a tann mesaz realite, e konfer lo li kado larezon par lekel i a kapab dekouver bann keksoz pou limenm. Sa i son don e lekipman pour egzamin larealite. Zonm pa’n ganny entansyonnen pou war atraver lizye en lot, pour ekout atraver zorey en lot oubyen konpran avek lespri en lot. Sak kreatir imen i annan talan endividyel, pouvwar e responsabilite dan plan kreativ Bobdye. i devwar sakenn pour sers larealite, e envestigasyon larealite par en lot pa pou byen servi nou.
En rezon akoz larelizyon in vinn en sours dezakor i akoz zonm in, dan en fason aveg swiv en larelizyon dan ki zot in ne. Ler zonm i a komans fer resers endepandan avek en lespri ouver, zot a kapab vwar par lao tou sa bann konfrontasyon, zot pou nobou aprann ki laverite ki annan dan zot larelizyon i osi egziste dan bann lezot gran relizyon ki egziste dan lemonn.
Abdul-Baha i dir nou:
Vi ki larelizyon i en sel, i pa kapab ganny divize, e diferans ki sanble egziste parmi bann nasyon i selman rezilta zot latasman ek prezize. Si selman zonm ti sers laverite, zot ti pou vwar zot menm inifye.
Enn bann rezon prensipal akoz i annan bokou konfli dan lemonn ozordi I akoz bokou dimoun in swiv zot zanset, tradisyon e lopinyon san demann kestyon. Dan lafwa Baha’I, lanfaz i ganny mete lo laresers endepandan afen ki sakenn de nou a kapab dekouver laverite pou limenm. Bondye in donn sakenn de nou en lespri e kapasite pou fer distenksyon ant sa ki byen e sa ki mal. Si bann endividi pa arive servi zot kapasite pou rezonnen, me swazir plito pou aksepte panse e lopinyon lezot san kestyon, swa par ladmirasyon ou lafreyer ki zot annan pou en dimoun, alor zot pe depriv zot lekor sa sans pour servi sa kado ki Bondye in plas dan zot.
Ser zanmi,dignite zonm i reste an premye, dan son kapasite pour resers laverite. Sa kapasite i en kondisyon lazistis e i anmenn lape. San laverite, lavi ti pou tris e i pa ti pou menm egziste akoz laverite i soutenir lavi materyel e spirtityel. Premye devwar ki Bondye in donn zonm, se konn limenm, pour ki , o fon, i ava trouv Bondye. Ler ou rezet laverite siantifik e relizye, sa i konparab avel lanmor e i antrenn bokou soufrans. Annou rappel byen ki en roz i zoli dan nenport ki zarden kot i fleri ; e en zetwal i briy parey partou. Laverite i reste laverite nenport ki landrwa i ete, zis parey lalimyer i reste lalimyer dan nenport ki lalanp i klere. Pour fer ou resers personnel lo laverite, fodre ou annan kouraz e sirtou fodre ou met ou konfyans dan Bondye.