Lansennyman Spirityel ek Lansennyman Sosyal
Ser zanmi oditer bonswar e byenveni a lekout nou progranm. Si zot rapel byen, dan nou de dernyen progranm, nou ti montre koman revelasyon Bondye i enn sel e i ganny devwale a limanite par diferan doz, a diferan lepok an fonksyon kondisyon ek bezwen lasosyete. Ozordi nou pou konpar bann lansennyman spirityel anmennen par bann profet avek bann lansennyman sosyal ki ganny aplike.
Nou komans avek en lapriyer, ekstre Tablet Bahá’u’lláh.
En vérité, Je vous le dis, voici le jour où l’humanité peut contempler la face et entendre la voix du Promis de Dieu. L’appel du tout-Puissant s’est fait entendre et la lumière de son visage s’est levée sur les hommes. Il convient à chacun d’effacer de la tablette de son coeur, toute trace de vaines paroles, et de considérer d’un esprit ouvert et exempt de préjugés les signes de sa révélasyon, les preuves de sa mission et les gages de sa gloire.
Bann lansennyman spirityel fondamantal bann profet i parey e i pa zanmen sanze, me bann lansennyman sosyal i sanze avek levolisyon limanite. Larevelasyon divin i touzour divize an de parti. Parey `Abdu’l-Bahá, garson Bahá’u’lláh i eksplike:
Sak revelasyon divin i divize an de parti. Premye parti i esansyel e i konsern lemonn eternel, e i lekspresyon lanmour Bondye. Dan tou larelizyon, lansennyman spirityel Parol Bondye i enn sel e i pa zanmen sanze. Dezyenm parti i pa eternel me i plito konsernen avek lavi pratik toulezour. Sa i konsern bann relasyon ek tranzaksyon imen e i sanze dapre levolisyon zonm, e osi dapre nesesite sa letan ki sak Profet i aparet.
Alor bann lansennyman spirityel pa zanmen sanze e tou larelizyon i ansenny sa bann menm laverite spirityel. E anmezir ki zonm i evolye e vin pli matir, en doz pli aprofondi sa bann lansennyman spirityel i ganny revele avek zonm dapre son kapasite ek son konpreansyon.
Zis pour rapel nou bann oditer, nou’n deza eksplike ki zis en sel profet pa kapab egziste akoz ki lafason ki lanatir ek zonm in ganny kree. Dan lanatir, tou keksoz i evolye dan en lord kin egziste depi nou kreasyon. Zonm osi i evolye fizikman, materyelman e mantalman. Alor premyerman, en profet i enstrir zonm Parol Bondye dapre son kapasite pour konpran son mesaz. Par egzanmp, Zezi ti dir avek bann zapot ki i annan bokou keksoz pour dir zot me zot pa ankor pare pour antann. Plitar kan i pou retournen, i pou dir zot tou laverite.
I initil pour eksplik bann keksoz syantifik avek bann zonm ki ti viv 2000 an pase akoz zot pa ti pou konpran. Alor i bezwen annan diferan profet ki viv dan diferan letan pour ogmant konesans zonm gradyelman. E sa i anmenn nou ankor enn fwa lo prensip bahay – Larevelasyon progresiv ki annan bi pour renouvle en sel larelizyon, en sel revelasyon, en sel laverite spirityel pour devlopman spirityel zonm.
Bann lansennyman sosyal bann profet i bezwen sanze avek levolisyon limanite e adapte avek kondisyon sa letan. Zis parey bann leson i bezwen sanze anmezir ki en zelev i progrese sorti dan en laklas pour al dan en lot pli avanse. Dan tou laklas nou aprann bann verti ki nou bezwen devlope pour vin bann sitwayen responsab depi ankor pti. Parmi sa bann verti se lanmour anver nou prosen, lonnekte, dir laverite, lazistis, lenportans lapriyer. Nou pa zanmen abandonn sa bann verti ki nou ti dekouver ankor byen zenn. Me anmezir ki nou grandi, nou konesans lo sa bann verti osi i agrandi pour adapte avek nou staz devlopman.
Bann lansennyman sosyal tou larelizyon i konsern nou lavi toulezour ek lorganizasyon nou lavi sosyal. Sa bann lansennyman i pa eternel me i plito sanze e evolye an fonksyon bann sanzman ek levolisyon dan lavi limanite. Sa bann lansennyman sosyal sak profet i touzour an akor avek bezwen limanite dan sa letan ki i aparet dan lemonn. Staz ki limanite i ete ozordi, eski labsans levolisyon teknolozik ti pou fer li avanse oubyen i ti pou retarde? Limanite in ariv en nivo matirite ki permet li eksplor e dekouver bann keksoz ki ti inimazinab 1000 an pase. I kapab fer li tousel atraver son prop envestigasyon, pour dekouver laverite, limenm.
Bann problenm sosyal ki ti egziste dan lansyennete pa ti ganny rezourd dan menm fason ki bann ki egziste ozordi.
Avek levolisyon materyel e mantal, lavi pe touzour sanze, bann problenm i ogamante e sanze. Alor bann konsey ki en profet i anmennen i bezwen adapte avek letan.
Annou pran en legzanp. Zezi, kan i ti vini, i pa ti vinn aboli larelizyon Zwif me plito pour donn li en nouvo lavi ek en nouvo lespri avek bann nouvo lalwa sosyal pour reponn bezwen sa letan, pour fer larelizyon kapab ankor enn fwa, sanze, kalme e rekonfort bann leker imen. Se pourkwa Zezi ti dir: “Mon pann vin pour detrir me plito pour akonplir.” Me malerezman Son mesaz ti ganny rezete par bann zwif.
Bann bahay i kwar an lorizin divin tou larelizyon presedan. Nou pa sanz larelizyon pour vin bahay akoz nou kwar ki i annan en sel larelizyon ki vin kot nou a diferan lepok. Ler nou aksepte larelizyon tou bann lepok, nou perfeksyonn nou lafwa dan Bondye. Larelizyon pa sanze. En legren ki zermen i prodwi rasin, e i devlop son tiz ek bann fey, bann fler ek fri. Sa pye i reste parey, i pa sanze, i zis grandi. Soley i reste parey menm si i sanble pe lev dan diferan landrwa lo lorizon.
Bann bahay i kwar ki tou bann profet lepase i annan menm lenportans e ki bi zot misyon i idantik, i parey. Zot tou zot bann zardiyen divin ki favoriz krwasans pye beni Bondye.
`Abdu’l-Bahá i dir nou:
Dan legren laréalité, en larelizyon in pouse dan laform en pye dibwa avek son bann fey, brans, fler ek fri. Apre en serten letan, sa pye in komans dépérir. Bann fey ek fler fannen e zot in mor. Apre sa pye in komans malad e nepli donn fri. I pa rezonab ki zonm i atas li avek en vye pye dibwa an prétendant ki son legzistans i éternel. Ankor enn fwa , legren laréalité fodre ganny plante dan leker zonm ,pour ki en nouvo pye i zermen e bann nouvo fri divin i kapab rafresir lemonn. Konmsa, bann nasyon ek pep ki annan diferans lo larelizyon, i ava rasanble dan linite, e en fraternite iniversel e vre i ava ganny etable. Lager i ava arete dan limanite; tou ava rekonsilye e ava vin bann serviter Bondye.
Dan bokou letan dan lavenir, kan lavi limanite avek tou son revolisyon teknolozik pou’n evolye ziska en pwe ki nou pa pou kapab rekonnet, limanite pou bezwen annan bann lalwa sosyal ki adapte avek en gidans spirityel pli profon sorti kot nou papa seles, par lentermedyer , ankor enn son bann port parol.